Mahai-inguruak, hitzaldiak, mintegiak… sorrera-sorreratik antolatu izan ditu AEDk, euskararen erabilera soziala bultzatu eta euskarari prestigioa emateko helburuarekin. Bide horretan jaio zen Kultur Ekitaldi Taldea, arrasatearrei mundu zabaleko eta punta-puntako gaien berri euskaraz jasotzeko eta partekatzeko abagunea eman zigun lantaldea. Gai interesgarriak ez ezik hizlariak ere jakintza eta ospe handiko euskaldunak izaten ziren eta makinatxo bat bider geratu zen txiki Monterron kultur etxeko aretoa.

1985eko apirilean ekin zion lanari emakume talde batek “ume umetandik pertsonaren nortasuna finkatzean emakumeak duen eragina kontutan hartuz, eta emakumeak nahi ez badu, euskalduntzea ezin lor daitekeena dela ikusiz”. Hartara, taldearen helburua izan zen “emakumeak mugitzen direneko esparruak euskalduntzea”, baina aldi berean eskuartean darabiltzaten gaiez informazioa ematea” eta “euskara eta Euskal Herria ezagutu eta maitatzera bultzatzea”. Horretarako antolatu zen lehenengo ekintzetako bat euskara praktikatzeko taldeak osatzea izan zen. Batera edo jarraian etorri ziren hitzaldiak, ikastaroak, tertuliak, bidaiak… eta lantaldea famatu egin duen talo postua!  Emakume taldeak izaera juridiko propioa hartu zuen 1995ean EKIN EMAKUMEAK AED elkartea izenpean eta bi ardatz bertsuen bueltan jarraitzen du lanean: andreak eta euskara. 

AEDk sortu eta urte betera antolatu zuen aurreneko Euskal liburu eta diskoen “saltokia”. Gabonei begirako sentiberatze kanpaina baten bueltan egin zen 1984ko azoka hura, “Oparirik ederrena musu eta liburuarena” lelopean. Hartara, herritarrek AEDren saltokian zein herriko liburu denda guztietan euskarazko materiala, %10eko beherapenarekin erosteko aukera izan zuten hainbat egunez. Euskarazko produkzioaren inguruko informazioa ere zabaldu zen etxeetara herriko ikastetxeen bitartez. 

Urteen buruan ekimena zabalduz, egokituz eta osotuz joan zen, alde batetik euskarazko produkzioa ere ugalduz joan zelako eta, bestetik, salmentarekin batera,  kultur ekintzak ere programatzen zirelako. Azkeneko edizioa 1998an antolatu zen.

Bertsolari berriak sortzeko eta bertsolaritza bultzatzeko sortu zen bertso eskola. Hasieran gazte talde bakarra elkartzen zen ostiralero. 1998an bi eskola finkatzea lortu zen, gaztetxoen eskola eta nagusien eskola.

Hemen dituzue argazkiak ikusgai: [1997]

Gure herriko ondare historiko, ekologiko eta kulturala ezagutzera emateko eta bide batez mendizaletasuna bultzatzeko asmoz, "Mugarriz mugarri Arrasate ezagutzen" txangoak antolatu ziren 1998an estreineko aldiz 2007ra arte.

Hemen dituzue argazkiak ikusgai: [2002] [2007]

Euskarazko antzerkia bultzatzeko asmoz, antzerki tailerrak, ikuskizunak... antolatu izan dira hainbatero. Tailerretan sortutako ikuskizunak, Arrasatetik kanpo ere eskaini izan dira.

Hemen dituzue argazkiak ikusgai: [1996] [2011]