Elkartean sortutako lehenengo lantaldeetako bat izan zen Kanpo Harreman Taldea. Herriko zerbitzu eta entitateetan euskararen presentzia eta erabilera areagotzea zuen helburu eta estrategia gisa aurrez aurreko bilerak baliatzen zituen nagusiki.

Arrasateko Udalaren eskariz, AED elkarteak “Arrasateko Merkataritzan Euskararen Erabilera Normalizatzeko Plana” diseinatu eta abiarazi zuen, 1998an. Plana bi fasetan gauzatzea aurreikusi zen. Lehenengokoan, parte hartu nahi zuten saltokietan euskararen egoera aztertuko zen eta, bigarrenean, saltoki horientzat egokitutako plan indibidualizatuak egingo ziren.

Matrikulazio garaietan, euskarazko D ikas ereduaren aldeko hainbat ekintza eraman izan dugu aurrera. Hasierako urteetan, EKBk, Euskal Kulturaren Batzarrak, zabaltzen zituen kanpainak herriratzea izaten zen AEDren egiteko.

Euskaldunok informazioa euskaraz jasotzeko daukagun eskubidea aldarrikatuz, etxetako postontzietan jasotako publizitatean eta idatzizko hedabideen herriko kroniketan euskararen erabilera neurtzen hasi zen 1990ean Kanpo Harreman Taldea.

Herritarrei nortasun agirian abizenak euskal grafiaz idazteko laguntza zerbitzua eskaini izan dugu urtetan. Hasiera batean, prozesu administratibo luzea eskatzen zuen horrek eta AED arduratzen zen burutu beharreko gestioez. Urteen buruan grafia aldaketa hori egiteko prozedura erruz arindu dute Administrazioek eta horri esker gaur egun nahikoa da norberaren jaioterriko epaitegian eskatzea.

AEDren eta Udalaren ekimenez, 1990eko martxoaren 28an sinatu zen Arrasateko Monterron Kultur Etxean Arrasateko elkarte eta erakundeen artean euskararen erabilera areagotzeko Hitzarmena.

Lan munduan eta horren barruan enpresatan, barne harremanetan zein enpresen artekoetan, euskararen erabilera suspertzeko helburuarekin jardun zuen taldeak.

Jaietako barraketan euskal giroa jartzeko asmoz muntatu zen hainbat urtez AEDren tonbola. Senpereraino ere bidaiatu zuen inoiz Seaskako lagunentzako sosa batzuk lortzen laguntzeko.

AEDk 1985ean kaleratu zuen aurrenekoz elkartearen bereizgarri izatera irits izen pegatina: “Eta hau, zergatik ez euskaraz?”.

Euskaldunak ahal duten guztietan euskaraz egitera animatzeko grabatu zen 1985. urtean zinemarako spota. Herriko bi zinematan eman zen spota, sei hilabetez jarraian, film emanaldi guztien hasieran. Antzezte nahiz bikoizketa lan guztiak AEDko militanteek egin zituzten eta oro har ondo baloratu zuten emaitza, herritar gehienen gustukoa izan zelako eta, garrantzitsuena dena, herriko jende ezagunaren bidez euskararen aldeko mezu bat zabaltzea lortu zelako.